AHIM

08:32

30-06

İLHAM SəMəDOV

Sual: Mənim atam Səmədov Nəsib Hümbət oğlu 1991-ci ildə Zlobin İqordən Bakı şəhəri Xətai rayonu Həzi Aslanov qəsəbəsi 7-ci dairəvi ev 24 ünvanındakı Fərdi yaşayış evi (yəni Həyət evi) dəyişməqlə (order ilə) əldə edib. Fərdi yaşayış evinin texniki pasportu var. Həmin fərdi yaşayış evi 1950-ci ildə tikilib. 1996-ci ildə order alındı və əvəzinə Bakı Şəhər İcra Hakimiyyət evin qeydiyyat vəsiqəsi verildi. 2000-ci ildə isə fiziki şəxslərin mülkiyyətində olan tikililərin qiymət cədvəli sənədi verildi. Həmin sənədə qanuni istifadə də olan həyətyanı torpaq sahəsi göstərilib. Mən qanuni istifadə də olan həyətyanı torpaq sahəsinə görə bələdiyyə vergi ödəyirəm. Mən indi qanuni istifadə də olan həyətyanı torpaq sahəsini özələşdirmək istəyirəm. Mənə nə sənədlər lazımdır və hansı qurumlara müraciyət etməliyəm. Çox xahiş edirem geniş cavab yazın. Əvvəlcədən təşəkkürümü bildirirəm.

Cavab:

İstifadənizdə torpaq sahəsininözəlləşdirilməsi üçün Azərbaycan Respublikası Əmlak Məsələləri Dövlət Komitəsinin Yanında Daşınmaz Əmlakın Dövlət Reyestri Xidmətinə ərizə ilə müraciət etməlisiniz. Ərizədə müraciət edən şəxsin soyadı, adı, atasının adı, ünvanı, şəxsiyyətini təsdiq edən sənəd, xahişin məzmunu və əlavə olunan sənədlər göstərilməlidir.

Ərizəyə aşağıda qeyd edilən sənədlər əlavə edilməlidir:

- torpaq sahəsinin istifadədə olmasına dair icra hakimiyyəti orqanı tərəfindən və yaxud digər dövlət orqanı (və ya bələdiyyə) tərəfindən verilmiş hər hansı bir sənəd;

- torpaq sahəsinin planı və ölçüsü;

- torpaq sahəsində yerləşən bina, qurğu, tikililərin və digər daşınmaz əmlakının (onların tərkib hissələrinin) texniki pasportu, plan-cizgisi;

- dövlət rüsumunun ödənilməsi barədə sənəd.

Daşınmaz əmlak üzərində mülkiyyət hüquqlarının dövlət qeydiyyatına alınması barədə çıxarışın verilməsi üçün 30 manat dövlət rüsumu ödənilir.

02:52

30-06

ALIM

Sual: salam,,Fiziki eqli cehetden ellil olan sexslere (1-2 ci qrup ) ev veya torpaq sahesinin verilmesi qanunvericilkle nece tenzimlenir?

Cavab:

Əlillər dövlətin hesabına mənzillə təmin edilirlər. I qrup əlillərə, sağlamlıq imkanları məhdud uşağın ailələrinə mənzillər növbədənkənar verilir. 1 qrup əlillər, habelə II və III qrup müharibə əlilləri ailədə adambaşına 9 kvadratmetr və daha az yaşayış sahəsi ilə təmin edilmiş olduqda mənzil şəraitinin yaxşılaşdırılmasına ehtiyacı olan şəxslər sayılırlar.

Bələdiyyə torpaqlarının mülkiyyətə (icarəyə) verilməsi məqsədilə torpaq hərracları və ya müsabiqələrinin keçirilməsi zamanı bərabər təkliflər irəli sürüldükdə Azərbaycan Respublikasının ərazi bütövlüyü uğrunda aparılan döyüşlərdə əlil olmuş şəxslərə və həlak olanların ailəsinə üstünlük verilir.

Bundan başqa, Azərbaycan Respublikasının ərazi bütövlüyü uğrunda aparılan döyüşlərdə əlil olmuş şəxslərə və həlak olanların ailəsinə, ehtiyata və ya istefaya buraxılmış hərbi qulluqçulara fərdi yaşayış evinin tikintisi üçün torpaq sahələri onların mülkiyyətinə bir dəfə pulsuz verilir.

04:41

27-06

HUSEYNOVA NAILE

Sual: salam torpaq alib ev tikmisik icazemiz var amma ustunu ortmeye baslayanda icra iscileri mudaxile etdiler evin ustunu ortmek ucun ayrica icaze almaq ne derecede duzgundur

Cavab:

Evin üstünün tikilməsi (örtülməsi) evin ümumi tikintisinin tərkib hissəsinə daxildir. Tikinti adı altında evin yaşayış üçün yaralı olan vəziyyətə gətirilməsi üçün zəruri olan bütün tikinti işləri başa düşülür. Ona görə də tikintinin hər bir mərhələsi üçün xüsusi icazənin alınmasına ehtiyac yoxdur.

Azərbaycan Respublikasının 01 yanvar 2013-cü il tarixdə qüvvəyə minmiş Şəhərsalma və Tikinti Məcəlləsinin görə mərtəbələrinin sayı 3-dən, hündürlüyü 12 metrdən və aşırımlarının uzunluğu 6 metrdən çox olmayan yaşayış evlərinin tikintisi üçün icazə tələb olunmur. Belə yaşayış evlərinin tikintisi üçün yalnız məlumatlandırma icraatı həyata keçirilir. Yəni, belə yaşayış evlərinin tikintisi üçün tikinti layihəsinin memarlıq-planlaşdırma bölməsinin hazırlanması lazımdır. Evi tikmək istəyən şəxs (yəni, sifarişçi) tikintiyə başlamazdan əvvəl tikinti niyyəti barədə yaşadığı ərazi üzrə icra hakimiyyəti orqanına məlumat verir və yaşayış evinin layihəsinin memarlıq-planlaşdırma bölməsini qanunun tələblərinə uyğunluğunun yoxlanılması üçün həmin orqana təqdim edir. Yaşayış yeri üzrə icra hakimiyyəti orqanı tərəfindən 3 ay müddətində layihəyə dair irad sifarişçiyə təqdim edilmədikdə, sifarişçi tikinti işlərinə başlaya bilər.

11:57

26-06

ELMIRA

Sual: Salam,ailemle Ermenistan qacqini olaraq Bakiya kocub bir ermeni ile evimizi deyiwib ustunde pulda vermiwik.Defelerle senedi yenilemiwik,sebeb certyojun sehv cekilmesi olub...2002ci ilde son defe cixardilib..indi nece ildiki qonwuyla yola gede bilmirik,özbawina taxta hasari iteleyib ev tikib,agacliqdi deye gormedik,insanliq eldib kecdik.sonra hasari ucurdu, ekdiyimiz agaclari kesib hemin erazini oz qapisina saldi,qardawimida werleyirler,az yawli uwagini qardawimin uzerine hucuma yollayir,bilirki azyawlidi deye polis hecne elemeyecek,gunahkar biz cixacayiq,icazesiz olaraq heyetimize girir,tikinti materiallarini ogurlayir,bir sozle mubarize apara bilmirik.Vaxtinda Baki weher icra hakimiyyetinde olduq,iwci gonderdiler.Hemin iwcide senede baxib qeti wekilde bildirdiki hasari yerinden ceksin.iller kecib dahada zebt eliyir.MIS dende adamlar geldi hecne ede bilmediler,dediler ki mehkemeye ver, haqqini al,evini ucursunlar agli bawina gelsinki dövletin qayda qanunu var.indiki mehkemeye muraciet etmek isteyirik,amma sened yenilenmelidi dediler,bunun ucunde yeniden ölculmelidi heyet.xeritecekmedende bir iwçi geldi dediki hasar yoxduc men ne bilimki bura senindi?ona gorede qonwu oz qapisina saldigi heyeti hesablamadi.qalan tormagi hesabladi 1sot artiq geldi.indi onun hesabini soruwurlarki sen bu 1sor torpagi hardan almisan,qapina kecirmisen?qeyd edimki elimizdeki 2002nin senedinde ev bir marwtabda verilib,heyetde ona bitiwik bawqa bir marwtabda verilib,ve uzerinde ölculer verilmeyib..irad tutandada hirslenirdilerki bize iwimizi öyretmeyin..buda onlarin i.ümumi sahenin ölcusunun sehv yazilmasi bizim gunahimizdimi?.indi nece edekki Haqqimizi alaq.inwAllah meslehetinizle yardim edersiniz.önceden tewekkurler.

Cavab:

Qonşunuz hərəkətlərinin qanunsuz olduğunu düşünürsünüzsə, məhkəmədə ona qarşı iddia qaldıra bilərsiniz. Lakin bu zaman qonşunuzun zəbt etdiyi torpaq sahəsinin Sizin mülkiyyətinizdə və ya qanuni istifadənizdə olmasını sübut etməyiniz lazımdır. İlk öncə sənədlərinizi qaydaya salmağınız və bundan sonra qonşunuza qarşı məhkəmədə iddia qaldırmağınız məsləhətdir.

04:07

24-06

VAFADAR MAMMADOV

Sual: Salam Hörmətli Huquqşunas, Sizdən mənə məslət verməyinizi xahiş edirəm. Mən bu yaxınlarda alığım torpaqda 1.52 sot özəlləşməmiş torpaq var. bunu necə adima kecirim ?

Cavab:

Həmin torpaq sahəsinin dövlət, yoxsa bələdiyyə mülkiyyətində olmasının müəyyənləşdirilməsi lazımdır. Yalnız bundan sonra həmin torpaq sahəsinə dair müqavilə bağlanması və Sizin mülkiyyətinizə verilməsi mümkündür. AR Torpaq Məcəlləsinin 56-cı maddəsinə görə Azərbaycan Respublikasının torpaq qanunvericiliyinə uyğun olaraq mülkiyyətə, istifadəyə və icarəyə verilməyən dövlət torpaqlarını müvafiq icra hakimiyyəti orqanı (öz səlahiyyəti hüdudunda AR Nazirlər Kabineti, Azərbaycan Respublikasının Əmlak Məsələləri Dövlət Komitəsi, AR Ekologiya və Təbii Sərvətlər Nazirliyi, yerli icra hakimiyyəti orqanları), bələdiyyə torpaqlarını isə bələdiyyələr müəyyən edir.

02:36

23-06

ULVİYYA

Sual: SALAM BİZDA EV PROBLEMİ VAR BABAM EVİ RAHMATA GETMAMİSDAN QABAQ VARASA KİMİ SAXTA YOLLA BİZ QEYDİYYATDA OLA OLA BİZA AİD OLAN EVİ RAZİLİQ ALMADAN ƏMİMA KECİRİB HAL HAZİRDA BABAM RAHMATA GEDİB 1 İLDİR. HAL HAZİRDA ƏMİMİN EVİ OLA OLA BİZİ MAHKAMAYA VERİB BİZİ EVDAN ÇIXARMAQ İSTAYİR XAHİS EDİRAM BİZA KOMAKLİK EDİN NECA EDİM Kİ EVİ ATAMIN ADINA KECİRAK MAHKAMADA QAZANA BİLAK AVVALCADAN TASAKKUR EDİRAM CAVABINIZI GOZLAYİRAM.

Cavab:

Babanız öz mülkiyyətində olan evi əminizə vəsiyyət etmək hüququ vardı və onun bu hüququnu həyata keçirməsi zamanı həmin evdə qeydiyyatda olan şəxslərin razılığının alınması tələb edilmirdi.

Atanız mərhum babanızın birinci növbədə vərəsəsi olduğundan vəsiyyətnamənin məzmunundan asılı olmayaraq mirasda məcburi payı vardır. Bu pay qanun üzrə vərəsəlik zamanı atanıza çatası payın yarısını təşkil edir (AR Mülki Məcəlləsi, 1193-cü maddə). Əgər atanız miras əmlakı qəbul etmişsə (yəni babanızın vəfatından sonra əmlaka sahiblik etməyə və ya əmlakı idarə etməyə faktik başlamış və bununla da mirası qəbul etdiyini şəksiz nümayiş etdirmişsə), onda mübahisəli mənzil üzərində mülkiyyət hüququnun tanınmasını tələb edə bilər. Çünki AR Mülki Məcəlləsinin 1255-ci maddəsinə görə qəbul edilmiş miras onun açıldığı gündən vərəsənin mülkiyyəti sayılır. Beləliklə, atanız məhkəmədə qarşılıqlı iddia verərək mənzil üzərində mülkiyyət hüququnun tanınmasını tələb edə bilər. İddia təmin olunacağı halda, mübahisəli mənzil üzərində əminizin tam mülkiyyət hüququ deyil, əminiz və atanızın paylı mülkiyyət hüququ dövlət qeydiyyatına alınacaqdır. Bununla da, əminizin atanız və onun ailə üzvləri olan sizi mənzildən çıxarılma tələbinin təmini imkanı aradan qalxacaqdır.

Bundan əlavə, onu da qeyd edək ki, atanız həm də əminizin adına notarius tərəfindən verilmiş vəsiyyətnamə üzrə vərəsəlik hüququ haqqında şəhadətnaməni də müvafiq inzibati-iqtisadi məhkəməyə müraciət etməklə mübahisələndirməlidir. Çünki həmin şəhadətnamədə yalnız vərəsə kimi əmizin göstərilmişdir.

21:27

22-06

LEYLA ASADOVA

Sual: Dovletin yolunu kasan vatandas barede hansi tetbiri koturmek olar.evimize kala bilmirik gonsunun hayatinden piyada kecirik Dovletin xaritesinde olan yolu vatandas Huseyn kasib xahis edirik bize komek edesiniz

Cavab:

AR Torpaq Məcəlləsinin 18-ci maddəsinin II hissəsinə görə, yaşayış məntəqələrinin torpaqlarının tərkibinə ümumi istifadədə olan torpaqlarda yerləşən meydan, küçə, keçid, yol, sahil, park, meşə-park, xiyaban, bulvar, sututarlar, çimərlik və əhalinin ictimai tələbatının ödənilməsinə xidmət edən digər obyektlər altındakı torpaq sahələri daxildir. AR Torpaq Məcəlləsinin 20-ci maddəsinin I hissəsinə görə, yaşayış məntəqələrinin torpaqlarından onların baş planlarına, ərazinin planlaşdırılması və tikintisi layihələrinə və eləcə də yerquruluşu-təsərrüfat planlarına müvafiq surətdə istifadə edilir. Əgər mülkiyyət hüququnuzun pozulduğunu hesab edirsinizsə, onda AR Mülki Məcəlləsinin 157.4-cü maddəsində nəzərdə tutulmuş imkandan istifadə edə bilərsiniz. Həmin maddəyə görə, əgər mülkiyyətə qəsd və ya başqa maneələr əşyanı götürmədən və ya ondan məhrum etmədən törədilirsə, mülkiyyətçi qəsd edəndən bu hərəkətlərə son qoymağı tələb edə bilər. Bu cür hərəkətlər davam etdirildikdə mülkiyyətçi həmin hərəkətlərə son qoyulmasını məhkəmə vasitəsi ilə tələb edə bilər.

Beləliklə, Siz evinizin yerləşdiyi ərazi üzrə rayon məhkəməsində həmin şəxsə qarşı iddia qaldıraraq mülkiyyətinizə qəsd edən hərəkətlərə son qoyulmasını tələb edə bilərsiniz.

13:16

20-06

RəHMAN MəMMəDZADə

Sual: Mən məhkəmə iclas protokolu ilə tanış olmaq istəsəm də hakim protokol hazır deyil deyə buna imkan vermədi.Sonra mən rəsmi qaydada " məhkəmə iclas protokolu ilə tanış olmaq və onun surətinin verilməsi barədə " Ərizə ilə məhkəməyə müraciət etdim. Lakin 10-15 gün keçsə də hakim vəsatəti müzakirə etmədi və mən məhkəmə iclas protokolu ilə tanış ola bilmədim.Nəhayət öz təşəbbüsümlə qismən də olsa məhkəmə iclas protokolunu oxuyub ona dair qeydlər yazib poçtla məhkəməyə göndərdim.Bu dəfə isə hakim mənim qeydlərimi müddətin buraxılması əsası ilə " baxılmasından imtina edilməsi barədə "qərardadla mənə geri qaytarmış və qərardadında bu qərardaddan şikayət verilə bilməz sözünü yazıb.İşi isə də apellyasiya məhkəməsinə göndərib .Bu halda mən nə etməliyəm? Qərardaddan abir başa apellyasiya şikayəti yazıb göndərmək hüququm var ya yox ?Çıxış yolu nədir?

Cavab:

Azərbaycan Respublikası Mülki prosessual məcəlləsinin 267.3-cü maddəsinə görə şikayət yazılı şəkildə qərardadı qəbul edən məhkəməyə verilir. Həmin Məcəllənin 274 və 395.1-ci maddələrinin tələblərinə əsasən, həmin qərardaddan şikayət verilməsi mümkün deyildir. Bununla belə, Siz Azərbaycan Respublikası Mülki prosessual məcəlləsinin 395.2-ci maddəsinə əsasən verilmiş hüquqdan istifadə edə bilərsiniz. Həmin maddəyə görə birinci instansiya məhkəmələrinin digər qərardadlarından şikayət verilmir. İşdə iştirak edən şəxslər bu qərardadlardan narazı qaldıqda qərardada olan etirazlarını apellyasiya şikayətlərinə daxil edə bilərlər.
Beləliklə, qərardaddan birbaşa apellyasiya şikayəti verməyiniz mümkün deyildir. Qərardada dair etirazınızı apellyasiya şikayətinizə daxil edə bilərsiniz.

00:37

19-06

ABDULLAYEV ELMEDDIN

Sual: respublika terefinden verilmis pay torpaqlarini beceren sahibkarin emek staji temin olunurmu?

Cavab:

“Məşğulluq haqqında” qanunun 3.0.2-ci maddəsinə görə mülkiyyətində torpaq payı olanlar məşğul şəxs hesab olunurlar. “Sosial sığorta haqqında” qanunun 13-cü maddəsinə görə … mülkiyyətində olan kənd təsərrüfatına yararlı torpaqları istifadə edən şəxslər torpağa mülkiyyət hüququnu təsdiq edən sənəd aldıqdan sonra bir ay müddətində müvafiq məlumatları təqdim etməklə məcburi dövlət sosial sığorta üzrə sığortaçı təşkilatda uçota durmalıdırlar. Həmin Qanunun 14-cü maddəsinə görə mülkiyyətində olan kənd təsərrüfatına yararlı torpaqları istifadə edən şəxslərin (hüquqi şəxs yaradanlardan, ailə kəndli təsərrüfatı üzvlərindən başqa) əmək qabiliyyətli ailə üzvləirinin hər biri üçün (alınan əmlak və torpaq payı hesabına şəxsi yardımçı və digər təsərrüfatlar daxil olmaqla) torpaq sahəsinin hər hektarına görə ölkə üzrə müəyyən olunmuş minimum aylıq əmək haqqının: torpaqların 1-ci keyfiyyət qrupu üzrə — 12 faizi; torpaqların 2-ci keyfiyyət qrupu üzrə — 8 faizi; torpaqların 3-cü keyfiyyət qrupu üzrə — 4 faizi; torpaqların 4-cü keyfiyyət qrupu üzrə — 2 faizi miqdarında, məcburi dövlət sığorta haqqı ödənilir. “Əmək pensiyaları haqqında” qanunun 21.2.10-cu maddəsinə görə mülkiyyətində kənd təsərrüfatına yararlı torpaq sahəsi olan şəxslərin həmin torpaq sahəsinə görə qanunvericiliklə müəyyən olunmuş qaydada məcburi dövlət sosial sığorta haqları ödədiyi müddət sığorta stajına daxildir.

Beləliklə, məcburi dövlət sosial sığorta üzrə sığortaçı təşkilatda uçota duraraq məcburi dövlət social sığorta haqqı ödədiyiniz müddət Sizin sığorta stajına aid edilir.

03:29

18-06

SEYFELI QURBANOV

Sual: Salam. Qarabag muharibesi istirakcisiyam. 2ci qrup elilem. Veteranliq senedimi almaq ucun hara muraciet etmeliyem?

Cavab:

Azərbaycan Respublikası Nazirlər Kabinetinin 216 nömrəli, 22 sentyabr 1995-ci il tarixli Qərarı ilə təsdiq edilmiş “Müharibə veteranı, silahlı qüvvələr veteranı və əmək veteranı adlarının verilməsi qaydası və şərtləri haqqında Əsasnamənin və müvafiq vəsiqələrin nümunəsinin, eskizinin və təsvirinin təsdiq edilməsi haqqında” Əsasnamənin 1-ci bəndinə görə, 1988-ci il fevralın 1-dən 1991-ci il oktyabrın 9-dək erməni millətçi dəstələrinə qarşı Ermənistanla həmsərhəd inzibati ərazi vahidlərində — Naxçıvan Muxtar Respublikası (Kərki kəndi daxil olmaqla), keçmiş DQMV ərazisində, habelə Laçın, Qubadlı, Zəngilan (Seyidlər kəndi daxil olmaqla), Cəbrayıl, Füzuli, Ağdam, Tərtər, Goranboy (keçmiş Şaumyankənd), Daşkəsən, Göygöl (keçmiş Xanlar), Kəlbəcər, Gədəbəy, Tovuz, Ağstafa, Qazax (Sofulu, Barxudarlı, Yuxarı Əskipara kəndləri daxil olmaqla) rayonları ərazilərində aparılan döyüş əməliyyatlarında iştirak etmiş şəxslərə — daxili işlər, milli təhlükəsizlik orqanları, Dövlət Sərhəd Xidməti və hərbi hissələr, yerli icra hakimiyyəti və hərbi idarəetmə orqanlari tərəfindən verilmiş arayışlar, hərbi biletlər, şəxsi işlər, orden və medallarla təltif olunmaq haqqında vəsiqələr, xəsarət (yaralanma, travma, kontuziya) alma haqqında arayışlar, əmrlərdən çıxarışlar, hərbi döyüşlərdə iştirakı sübut edən başqa sənədlər əsasında; 1991-ci il oktyabrın 9-dan 1994-cü il mayın 10-dək döyüş əməliyyatları aparan hərbi hissə və ya orqanların tərkibində hərbi xidmət keçmiş şəxslərə, döyüş əməliyyatları aparan hərbi hissələrə və ya orqanlara döyüş tapşırığının yerinə yetirilməsi üçün e`zam olunmuş hərbi qulluqçulara 10 may 1994-cü il tarixindən sonra döyüş zonasında hərbi xidmət keçərkən yaxud döyüş zonasında döyüş tapşırığının yerinə yetirilməsi ilə bağlı e`zamiyyətlərdə olarkən bilavasitə döyüş əməliyyatları ilə əlaqədar xəsarət (yaralanma, travma, kontuziya) almış hərbi qulluqçulara — müdafiə, daxili işlər, milli təhlükəsizlik, ədliyyə orqanları, Dövlət Sərhəd Xidməti və hərbi hissələr və Xüsusi Dövlət Mühafizə Xidməti və Naxçıvan Muxtar Respublikasının Ədliyyə Nazirliyi tərəfindən verilmiş arayışlar, şəxsi işlər, hərbi biletlər, orden və medallarla təltif olunmaq haqqında vəsiqələr, xəsarət (yaralanma, travma, kontuziya) alma haqqında arayışlar və əmrlərdən çıxarışlar, hərbi döyüşlərdə iştirakı sübut edən başqa sənədlər əsasında “Müharibə veteranı” adı verilir. «Müharibə veteranı» adı və müvafiq veteran vəsiqəsi Azərbaycan Respublikasının Müdafiə Nazirliyi, Daxili İşlər Nazirliyi, Milli Təhlükəsizlik Nazirliyi, Dövlət Sərhəd Xidməti, Ədliyyə Nazirliyi, Xüsusi Dövlət Mühafizə Xidməti və Naxçıvan Muxtar Respublikasının Ədliyyə Nazirliyi tərəfindən onların yaratdıqları müvafiq komissiyaların rə`yinə əsasən verilir.

24 25 26 27